仲有
「重有」意思即是「还有」，广东俗语，有人写成「仲有」，这是错的。
除了「重有」，「重系」「重想点？」等中的「重」很多人错写成「仲」。
广府话嘅「重」字，多音多义，而且好常用。
错写成「仲」，系出于香港娱乐记者嘅手笔，竟然传到通街都系，实在可怜。终于传到互联网，互联网嘅传播速度比报纸杂志快好多倍。好彩我都重见到有人用「重」，不过就真系比较少喇。
「仲」字一般解作「居中」，表示系中间嘅位置。最常见嘅系用嚟表示每季嘅第二个月，例如春季第一个月叫做「孟春」，第二个月就叫做「仲春」。同一道理，秋季嘅第二个月，就系「仲秋」了。至於古时兄弟姊妹之间，排行第一嘅叫做「伯」，排第二嘅就叫做「仲」嘞。
「重」字读 zung6 [同音字: 颂] 时，有「再」、「还」嘅意思。其实呢个音义相当之古雅，
《尔雅·释天》：「太岁在辛曰重光。」呢个「重光」唔系读「从光」，因为唔系暗而复光，而系「更加光」，所以应该读做「颂光」。所以〈释文〉话，「重」字读「直龙切」(即zung6)。
《乐府》：「行行重行行，与君生别离。」呢一句诗唔用广府音嚟读唔得。「行行」读做「行街」嘅「行」。──呢个音见於《广韵》，下夏切，即系haang4音。解为「行迹」。「行行」，系一路行，愈行愈远，「重行行」，即更加行，噉先显得出「与君相别离」嘅无可奈何。
屈原《离骚》：「纷吾既有此内美兮，又重之以修能。」意思即系屈原既有此内在之美质，还更有绝远之能耐。
汉朝嘅王逸喺解释《离骚》此文时，就话：「内含天地之美气，又重有绝远之能。」王逸呢一句「重有绝远之能」，同我哋今日所讲嘅：「重有最靓猪腩肉」，喺句式结构上并无二致。
宋朝嘅洪兴祖解释《离骚》「重」字嘅时候话：「『重』，储用切，再也，非轻重之重。」可见《离骚》呢句「重」字应读去声，正系「再次」嘅意思。